80

ملک بھر میں شدید بارشوں، برفباری اور لینڈ سلائیڈنگ سے100 سے زائد افراد جانبحق، ہلاکتیں بڑھنے کا اندیشہ

اسلام آباد (ویب ڈیسک) نیشنل ڈیزاسٹر منیجمنٹ اتھارٹی (این ڈی ایم اے) نے ملک بھر میں شدید بارشوں، برفباری کے باعث گزشتہ 3 دنوں میں مجموعی طور پر 100 سے زائد افراد کے جاں بحق ہونے کی تصدیق کردی جبکہ جاں بحق افراد کی تعداد میں اضافے کا اندیشہ بھی ظاہر کیا ہے۔

تفصیلات کے مطابق شدید بارشوں کے باعث ہزارہ ڈویژن، آزاد کشمیر، گلگت بلتستان اور مالاکنڈ ڈویژن میں لینڈ سلائیڈنگ اور برفانی تودہ گرنے کی وجہ سے شاہراہِ قراقرم سمیت دیگر اہم شاہراہیں اور سڑکیں بند ہوگئیں جبکہ چترال کا صوبے کے دیگر حصوں سے زمینی رابطہ منقطع ہوگیا۔

ادھر این ڈی ایم اے کی جاری کردہ تفصیلات میں بتایا گیا کہ موسم کی خراب صورتحال کے باعث سب سے زیادہ 61 افراد آزاد کشمیر میں جاں بحق ہوئے جبکہ صوبہ بلوچستان میں بارشوں، برفباری کے مختلف واقعات میں 20 افراد جاں بحق اور 11 زخمی ہوئے۔

این ڈی ایم اے کا کہنا ہے کہ ملک بھر میں بارشوں اور برفباری کے باعث مختلف حادثات میں 29 افراد زخمی ہوئے جبکہ 35 مکانات کو نقصان پہنچا۔

واضح رہے کہ ملک کے شمالی اور مغربی علاقوں میں شدید برف باری کا سلسلہ جاری ہے۔

وزیر اعظم عمران خان نے سماجی رابطے کی ویب سائٹ پر ٹوئٹ کرتے ہوئے کہا کہ انہوں نے این ڈی ایم اے، فوج اور وفاقی وزرا کو فوری طور پر آزاد کشمیر کے عوام سے تعاون کرنے کی ہدایت کردی ہے۔

علاوہ ازیں سب سے زیادہ افراد آزاد کشمیر کی وادی نیلم میں برفانی تودہ گرنے کے سبب جاں بحق ہوئے اور اس حادثے کے نتیجے میں 2 درجن مکانات، متعدد دکانوں اور ایک مسجد کو بھی نقصان پہنچا۔

واقعے کے بعد مقامی انتظامیہ نے فوجی اہلکاروں اور ڈیزاسٹر منیجمنٹ حکام کے ساتھ مل کر ریسکیو اور ریلیف کے کام انجام دیے۔

این ڈی ایم اے کے مطابق آزاد کشمیر کی وادی نیلم کے گاؤں سورنگن میں برفانی تودہ گرنے سے 19 افراد دب کر جاں بحق ہوئے۔

مذکورہ واقعے سے متعلق یہ اطلاعات سامنے آئیں کہ ریسکیو اہلکار تودے کے نیچے دبے دیگر افراد کو نکالنے کی کوشش کررہے ہیں جبکہ 4 زخمیوں کو نکالا جاچکا ہے۔

ترجمان این ڈی ایم اے نے بتایا کہ برف میں پھنسے ہوئے افراد کو بذریعہ ہیلی کاپٹر نکالنے کے لیے انتظامات کیے جا رہے ہیں اور متاثرین کے لیے راشن اور ٹینٹ مظفر آباد سے روانہ کر دیے گئے ہیں۔

آزاد جموں و کشمیر حکومت کے سینئر عہدیدار فیاض علی عباسی نے کہا کہ صرف وادی نیلم میں شدید برف باری کے باعث مختلف حادثات میں 59 افراد جاں بحق ہوئے جن کی لاشیں برف کے نیچے سے نکالی گئیں۔

انہوں نے کہا کہ دیگر 53 افراد کو زخمی حالت میں نکالا گیا۔

ان کا کہنا تھا کہ تقریباً 80 فیصد جانی نقصان تحصیل شاردہ کے علاقے سُرگن کے دیہاتوں بَکوالی اور سیری میں ہوا۔

ترجمان بلوچستان حکومت لیاقت شاہوانی نے بتایا کہ برفباری کے نتیجے میں کچے مکانات گرنے سمیت مختلف حادثات میں 20 افراد جاں بحق ہوئے۔

انہوں نے کہا کہ وزیر اعلیٰ بلوچستان جام کمال خان نے تمام ریسکیو آپریشن کی نگرانی کرتے رہے اور دستیاب وسائل میں رہتے ہوئے بھر پور ریسکیو آپریشن جاری ہے۔

ترجمان نے کہا کہ دور دراز علاقوں کے لنک روڈز تاحال بند ہیں جنہیں بحال کررہے ہیں۔

اس کے علاوہ خوجک ٹاپ پر شدید برفباری کی وجہ سے زیارت اور کوئٹہ کے مابین موصلاتی رابطے شدید متاثر ہوئے ہیں جبکہ کوئٹہ-چمن شاہراہ بھی ٹریفک کے لیے بند ہے۔

موسم کی شدت کے سبب خیبرپختونخوا میں بھی برف باری کا سلسلہ جاری ہے اور صوبے میں سب سے زیادہ برفباری لواری اپروچ روڈ پر23 انچ ریکارڈ کی گئی۔

پاکستان کےصوبہ خیبر پختونخوا کے ضلع چترال اور مضافات میں پیر(13 جنوری) کی رات سے شدید برف باری کا سلسلہ جاری رہا جس کے باعث چترال بھر میں تمام شاہراہیں بند ہوگئیں جبکہ چترال کو ملک کے دیگر حصوں سے ملانے والا واحد زمینی رابطہ لواری ٹنل بھی کل براڈام کے مقام پر برفانی تودہ گرنے سے بند ہوگیا۔

مقامی تھانے عشریت کے اسٹیشن ہاؤس آفیسر(ایس ایچ او) نے ڈان کو بتایا کہ گزشتہ روز چھوٹے ٹنل کے قریب براڈام کے مقام پر ایک بھاری بھر کم برفانی تودہ گرنے سے لیویز اور پولیس کے جوان بال بال محفوظ رہے تاہم گلیشئر گرنے کی وجہ سے پشاور-چترال شاہراہ ہر قسم ٹریفک کے لیے بند ہوگئی جس کی وجہ سے مسافروں کو شدید مشکلات کا سامنا کرنا پڑ رہا ہے اور درجنوں گاڑیاں لواری ٹاپ میں پھنسی ہوئی ہیں۔

چترال پولیس کے مطابق بونی، مستوج، گرم چشمہ، وادی کیلاش، ملکہو، تورکہو کی سڑکیں برف باری کے باعث ہر قسم ٹریفک کے لیے بند ہیں۔

اس خبر پر اپنی رائے کا اظہار کریں

اپنا تبصرہ بھیجیں